Hugleiðingar húsfreyju í sveit

oj barasta

2006-03-10T02:30:00.000Z

Eyddi dágóðum tíma við að hreinsa út heil 10 subbu spam komment við síðasta póst.
Kipptist í gírinn þegar mér barst tilkynning í tölvupósti um að einhver hefði kommentað afar mikið um rassa á þessari síðu.
Fjandinn, hugsar kannski einhver (ef einhver er enn að fylgjast með blogginu). En það verður að hafa það. Rassa má finna allstaðar, óþarfi að auglýsa þá á útlensku í kommentum.

Skrapp í kvöld sem önnur kvöld í ljósmyndaleiðangur. Tunglið ætlaði ekki að láta sjá sig, en loksins kom það í ljós og ég þurfti að beita sjálfa mig hörðu við að koma mér heim.

Tók mig til rétt fyrir áramót og byrjaði á nýju verkefni.
Mynd á dag.
Verkefnið er strembið, oft erfitt að rífa sig upp og finna eitthvað myndefni sem er áhugavert, láta sér detta einhverja vitleysu í hug og framkvæma hana.
Ég hef í hyggju að halda þessu áfram eins lengi og ég held út. Hef haldið út núna mun lengur en ég bjóst við.
Mæli með að kíkka við þarna, þetta er orðið hálfgert myndablogg hjá mér. Frúnni orða vant, aldrei þessu nær.

Úr sveitinni er allt það besta að frétta. Hlutirnir ganga fyrir sig eins og þeir eiga að gera. Húsfreyjan sér að vísu fram á nokkrar vikur þar sem hún þarf að stinga sig upp á hvern dag, hálfger dreifbýlisþyrnirós með mission.

jámm...jámm

2005-11-16T02:08:00.000Z

Þetta kemur allt saman.

Er búin að vera hryllilega löt við að blogga í guð-má-vita-hvað-lengi.
Meira að gerast á ljósmyndasíðunni minni á Flickr (klikka á myndina til að komast þangað).

Er að taka lífinu með eins mikillri ró og hægt er þessa dagana. Allt komið á fullt fyrir aðventu- og jólaundirbúning í vinnunni. Og ég með sauma innan á maganum sem mig klæjar svo í. Dreymir um að klóra mér í naflanum innanfrá með grófasta píanóstreng sem fyrirfinnst.

Hér er hún Vatnsenda Rósa.
Skipaði frænku minni í gúmmístígvél af húsbóndanum og lét hana vaða út í sjó upp að hnjám vafða inn í akrýldúk.
Allt með góðum keppnisanda að sjálfsögðu, enda var þemað Draugar.

opna

2005-10-11T01:05:00.000Z

Opnan mín í Árbók íslenskra áhugaljósmyndara 2005.

Bókina er hægt að panta á netinu ef einhver hefur áhuga
Ljósár 2005 - panta

haustlitir

2005-09-30T02:15:00.000Z

Eftir hríð, slyddu og norðanrok kom loks milt og fallegt kvöld.
Ég brá mér í Lystigarðinn....ja.....brá mér...sko...Garðinum er lokað frekar snemma en ég ákvað að skreppa í smá myndatökuleiðangur.
Lagði bílnum á FSA stæðinu og klifraði varlega yfir hliðið sunnan megin í garðinum.
Varla búin að rétta úr mér eftir klifrið þegar að mér kemur maður í úlpu. Mér fannst því best að rifja upp gamla og góða siði og bauð honum góða kvöldið, sagðist ætla að taka myndir, hvort ég mætti það ekki.
Hann horfði á mig eins og ég væri klikkuð.
Spyr svo hvort að garðurinn sé lokaður, hafði verið á kvöldgöngu og ákveðið að fara í gegnum garðinn.
Lokaður eða opinn, hliðið austan megin var opið og á milli trjánna héngu ljósakeðjur sem lýstu upp haustlaufin sem þöktu stígana.
Ég gleymdi mér í langan tíma við að ganga um og skoða haustlitina, smella af nokkrum myndum og njóta þess að hvorki rigndi né snjóaði.
Spurning hversu lengi þetta endist....

innkoma

2005-09-28T12:34:00.000Z

"Lokaðu hurðinni á eftir þér, vinur/vina"

"Viltu loka hurðinni"

Ég segi þessar setningar oftar en ég hef tölu á á hverjum degi.

Eru börn í dag orðin of vön sjálfvirkum hurðum? Eða búa þau svo vel að hafa þjóna og bryta sem loka á eftir þeim?

snap snap

2005-09-20T01:29:00.000Z

Langur mánudagur að baki, nemendurnir misryðgaðir eða smurðir, allt eftir því hvernig á það er litið.
Skrapp og tók nokkrar myndir af honum Orra Harðar fyrir nýju plötuna hans. Hafði mjög gaman af því að taka myndir af lifandi viðfangsefni, ansi skemmtileg tilbreyting frá ryðguðum traktorum og fjallshlíðum.
Kvöldinu eytt í að velja úr, henda, laga, skera og setja upp myndirnar. Margar bara þrusu góðar og ég vona að módelinu finnist slíkt hið sama.

bækur og gaul

2005-09-18T22:14:00.000Z

Overworld : The Life and Times of a Reluctant Spy eftir Larry J. Kolb

Life is Huge! eftir Susan Jeffers

Field Guide to the Apocalypse : Movie Survival Skills for the End of the World eftir Meghann Marco

The Experts' Guide to 100 Things Everyone Should Know How to Do eftir Samönthu Ettus

Smá hluti af hrúgunni á náttborðinu.
Svo er hrúga með ljósmyndabókum, Bókum um hvernig á að kenna laglausum og taktlausum tónlist og eitthvað af bókum um hvernig heilinn í okkur virkar.

Ekki beint eins og lestrarlisti einnar manneskju.

Var að enda við að hlusta á Lífið í hægagangi með Gráa Davíð. Stórfínt barasta og Davíð virðist vaxa ágætlega.
Ekki hægt að segja það sama um nýjasta garnagaul Sigur Rósar. Ég gerði heiðarlega tilraun til að smyrja eyrun að innan með þessum disk, þar sem hann átti að vera undursamlegur. Eitt skipti var nóg.
Ég er ekki þessi týpa sem hlustar á plötur 25 sinnum svona djöst in keis að þær verði góðar við þrítugustu hlustun.
Það bara virkar ekki svoleiðis á þessu heimili.

Mér barst pakki frá adorama.com á föstudag. Næstum eins og jólin væru komin.
Annars segir The Field Guide to the Apocalypse:
How to recognise a dreamworld: All things you ever wanted come true.
Mig langaði í gleiðlinsu og ég keypti/fékk hana.
Go dreamworld GO! Nú þarf ég bara að fá mér nýtt baðker, flatskjás sjónvarp, NASA rúm .........

Næturfrost

2005-09-08T03:17:00.000Z

Norðurljósin sveipuðu himininn inn í grænar slæður eftir miðnættið og það stirndi á grjót og götur, brakaði í grasinu og loftið var kalt og ferskt.
Það er komið haust greinilega.
-og mér finnst það bara nokkuð gott.

samsæri?

2005-09-05T23:24:00.000Z

Ég keypti bakka af jarðarberjum. Ég eyddi dágóðum tíma í að gramsa í staflanum í ávaxtadeildinni til að finna góðan bakka.
Flott ber efst, djúsí rauð og fín, virtust stinn og hvergi að sjá nokkra skemmd.
Glöð hugðist ég kjamsa á rauðmetinu yfir bók um kvöldið.

Það er sennilegast samsæri ávaxtabænda í útlandinu að hafa svona þykkt plast neðst á botninum í jraðaberjaöskjum, helst líka að það nái vel upp hliðarnar.
Öll berin undir efsta laginu voru blá. Ekki rauð, nei, blá og loðin.

nýr linkur

2005-08-30T00:46:00.000Z

Var að bæta við honum Einari Ragnari í linkana hér til hliðar. Líka til íslenskt blogg hjá honum.
Frábær ljósmyndari og gaman að kíkja á bloggið hjá honum.

ónýtt

2005-08-29T20:17:00.000Z

Fór í torfærur á Golfinum út í Haganesvík í Fljótum. Sá glitta í eyðibýli af þjóðveginum og ákvað að prófa veginn. Hann leit svosem þokkalega út svona framan við hliðið.
Eftir 300 metra þá var vegurinn orðinn vörubílafær, eftir 500m var mér hætt að lítast á blikuna, hvergi hægt að snúa við og eins og allt oddhvassa grjót heims hefði verið sett upp á ruðningana ofan við hnédjúp hjólförin.

Og þá mundi ég að ég þyrfti að taka til heima hjá mér....

Merkilegir staðir utan vegar úr alfaraleið. Fer á jeppanum næst.

vont veður

2005-08-25T17:08:00.000Z

Mig langar í bíltúr með sólina í andlitið.
Allt of snemmt að horfa á gráar hlíðarnar á Tröllaskaganum, ekki kominn September og þörf á að grafa nefið niður í sængina á meðan að stormurinn og rigningin lemja gluggana.

myndirnar

2005-08-25T16:48:00.000Z

Nokkrar síður núna í júlí og ágúst sem hafa notað myndirnar mínar.
Svona fyrir þá sem hafa áhuga á að fylgjast með myndunum mínum.
Ég á einhverjar þarna
Myndablogg hjá Loquor
Blóm
28. ágúst á að birta Lime-ið mitt sem mynd dagsins hér
Marglyttan
Vikulega Survivor keppnin
Mr. Narbenfarkle fílaði berið mitt
Einn gluggi hér

nei og aftur nei

2005-08-24T17:54:00.000Z

Ótrúlegt!
Ó helga nótt er búið að hljóma innan í höfðinu á mér í allan dag.
Á ensku.
Með hvorki konu né karlsöngvara.
Bara þetta hér: o niiiiiiight, deviiiiiiine og svo restin í þoku.

Ekki gott að vera með svona glefsu á heilanum, ekki einu sinni þó að væri desember.

byrjað aftur

2005-08-22T17:00:00.000Z

Vinnan byrjaði aftur í dag og sumarfríi því offissíelt lokið.
Erfitt að sitja á löngu námskeiði eftir að einbeiting hefur mestmegnis verið við að hlusta í mesta lagi á veðurfréttir í 2 mínútur í allt sumar. Tal sem fer yfir 3ja stafa tölu í sekúndum á það til að verða óskiljanlegt og svæfandi eftir að hafa haft fuglasöng og goluna í eyrunum í margar vikur.

Þetta hlýtur samt að koma fljótt aftur, þessi óendanlega vinnuvíma og sýki sem virðist herja á mig ár eftir ár þrátt fyrir að lofa sjálfri mér að nú skuli ég nú gera þetta og hitt og ekki gera þetta eða eitthvað allt annað.

Skellti mér upp á heiði með ættingjum í draugamyndatökur við gömlu Geldingsárréttina. Skemmtum okkur konunglega yfir hve við gátum gert okkur sjálf smeyk.
Og íslenska sauðkindin starði á okkur ofan úr hlíðunum, forviða yfir þessu hvítklædda og svartskikkjuklædda fólki sem flissaði eins og bjánar yfir eigin uppákomum.

skriffinnska

2005-08-19T03:44:00.000Z

Helgin framundan spennandi hjá mér þrátt fyrir að ég þurfi að leggjast í ritstörf.
Mér hefur verið boðið að skrifa grein sem á að fylgja með um 6 af ljósmyndunum mínum fyrir tímarit í Kanada sem heitir U&I Magazine.
Djö hvað ég er að rifna núna....
Myndirnar eru allar úr hringferðalaginu mínu núna í sumar.
Og jú, það eru meira að segja Þingvellir.

flottur

2005-08-17T00:10:00.000Z

Lenti í 1. sæti í keppni "Product Placement" með myndina af traustu kerrunni húsbóndans frá því að við skruppum hringinn um daginn.
Bara að monta mig smá.

skýfall

2005-08-16T17:48:00.000Z

Til eru þessi venjulegu skýföll eins og undanfarna daga þar sem himininn opnast og það virðist sem að allt vatn heimsins hellist niður.

Ég hef aldrei séð svona ský áður, mér þætti gaman ef einhver getur sagt mér afhverju þau líta svona út og eins ef að þau hafa nafn.

á kafi

2005-08-15T00:59:00.000Z

Er búin að stinga höfðinu í kaf í sumar, ferðast um og slappa af. Stilla sjóndeildarhringinn upp á nýtt og nýta tímann vel.
Komin heim eftir flandrið og við mér blasa hrúgur af ýmsum verkefnum að hausti; heima fyrir og í vinnu.
Mörg hundruð ljósmyndir bíða eftir að verða skoðaðar, gólfin farin að þrá ryksugun og raka moppu strjúka sér um kvista og skot, stofan hrópar á nýja uppröðun í húsgögnum.
Svarti unglingssonur minn með loðfeldinn hefur ekki sést í 4 daga. Þarf að fara að leita að honum á morgun.
Og ég lofa að blogga meira.
En þangað til næst.....best að stinga höfðinu ofan í það sem fyrir hendi er....

fjársjóðir

2005-07-16T19:40:00.000Z

Frábær skemmtun við fjöruhreinsun með fjölskyldu og vinum í dag.
Þó að ég hafi nú eiginlega verið ráðin bara sem ljósmyndari og losnað við að tína rusl. Notaði tímann og geiflaði mig framan í börnin og sagði úú vá og aaa við öllum fjársjóðunum sem mér voru færðir til sýningar og myndatöku.

sumarið

2005-07-11T14:32:00.000Z

Það er sumar og ég er næstum búin að gleyma hvernig á að skrifa. Blogg kemur þegar það kemur..... Á meðan; njótið vel.

jah

2005-07-04T18:52:00.000Z

Ja, það er víst kominn júlí. Ég ætlaði að skrifa þá....eða?

Allt í mestu rólegheitum hér í sumarfríinu mínu. Búin að dunda mér við myndatökur og ýmislegt spennandi gerst þar. Segi frá því síðar, eða öllu heldur monta mig af því síðar.
Garðurinn var ansi líkur frumskógi þegar ég kom heim úr fríinu, 28 sekkir af grasi og rusli þegar við hjónakornin réðumst í að slá og raka og tína upp greinar og rusl. Lífrænt rusl allt saman, ekki svo slæmt.
Jah...fátt að blogga um núna.
Nema að lífið er dásamlegt og ég vona að allir njóti þess vel (þó að mígrigni hér fyrir norðan).

loksins

2005-06-30T13:57:00.001Z

Þetta var ég að vona og er ekkert smá spennt að heyra.
Drengurinn algerlega sér á parti í steingeldri keppninni í fyrra og löngu tímabært að heyra aftur old-school söng.

heiðardalurinn

2005-06-26T22:49:00.000Z

Ég er komin heim í sveitasæluna og búin að heyja í garðinum. Myndir úr ferðinni má m.a. sjá hér í þessu myndasetti frá Eisenach. Gamla Austur-Þýskaland, ekki þó svo gamalt, þar sem að ég vaknaði við DDR fánann blaktandi í næsta húsi.
Merkilegt hvað er alltaf gott að koma heim, skríða undir eigin sæng á vel kunnuglegri dýnunni og geta talað upp úr svefni og andvarpað til skiptis.

Fleiri myndir, teknar allt um kring, enda var súmmað niður til Sviss og Austurríkis, upp og niður árfarvegi við vínekrurnar, góða veðrið hundelt (með misjöfnum árangri).

Fyrir myndaskoðara bendi ég á að á Flickr síðunni minni er hægt að skoða meira og meira ef einhver vill.

vatn

2005-06-22T22:42:00.000Z

Dauðaleit að vatnsdropa, hvergi nokkuð að sjá nema vínvið og vínkjallara, Mósel liðast á ofurhægum hraða á meðan malbikið í Trier bráðnar í Júnísólinni. Hitastig í skugga ansi nálægt innri hita mannskepnunnar, bíllinn býður ekki upp á súrefni til innöndunar. Sjóðheitir upphandleggir ferðalangs frá Norðurslóðum eftir hádegismatinn í hlýrabol. Rínarfljótsbúar og Móseldalsfólk glottir í glampanum af sólbrenndum öxlum náfölra hálfþýsku-talandi-útlendinganna sem ferðast um með þráðlausa en sambandslausa tölvuna. Tæknisjúkir Norður-Atlantshafsbúar í fráhvarfi eru sjaldnast fögur sjón.

Eftir langa dvöl í fyrrum Austur-Þýskalandi var gott að komast "vestur yfir", hrista af sér nokkur korn af menningarsjokki og horfa með glott á vör á "McDonalds bei Rechtung Kassel B7", súmma á átóban á draumkenndum hraða á íslenskan mælikvarða. Kveðja gamla DDR fána blaktandi við hún yfir Wartburg eðalvögnum austursins í einkar íhaldssömum fjallaþorpum.
Vera nær týpískur túristi á vesturleið með upptrekktan Trabant sem minjagrip í poka.

Heimsótti merkisstaði, þar sem Internet, SMS og WAP teljast óþekktir hlutir; almenningssalerni og verslun með plastkortum nær óþekkjanleg, þar sem tíminn stóð í stað og stendur enn.
Þrátt fyrir að girðingar og vaktpóstar hafi verið rifnir niður fyrir löngu.
VISA um allan heim hringir kaldhæðið innan í höfðinu á mér og ég er næstum farin að semja bréf í huganum til bankans og þeirra sem standa fyrir því að láta okkur halda að allur heimurinn hafi plastvæðst.
Hér gildir nefnilega ekkert nema pappírspeningar og klink og eins gott að hafa tekið eftir í ÞÝS 603 hér í denn.
Hefði samt þurft til ÞÝS 93445903 til að skilja konuna í fyrradag.

plögg

2005-06-05T11:26:00.000Z

Matthíasarvaka MENOR

Hátíðardagskrá á Akureyri í tilefni af 170 ára afmæli Matthíasar Jochumssonar.
Sigurhæðum, Akureyrarkirkju og Ketilhúsinu sunnudaginn 5. júní 2005.

Sigurhæðir, hús Matthíasar opnar 13:00 og er opið á meðan vakan stendur yfir. Þar verður hægt að fá leiðsögn og í boði eru kaffiveitingar.
Akureyrarkirkja, Helgistund í tali og tónum 13:30
Safnaðarheimili Akureyrarkirkju, Dagskrá í tali og tónum 14:00.
Ketilhúsið klukkan 16:00. Meira tal og fleiri tónar.

Aðgangur er ókeypis.

loksins

2005-06-03T18:24:00.000Z

Ég er komin í sumarfrí.
Skrifa ekki meira hér fyrr en í júlí.
Góðar stundir og hafið það gott í bili.

-eða Auf Wiedersehen.

regn

2005-06-01T00:57:00.000Z

Síðdegisskúrir og kvöldslettur.
Þetta er allt að hafast, niðurteljarinn kominn í gang hjá mér.
Lítið gert annað en að undirbúa utanför og klára vinnuna, skroppið þó í ferska göngutúra með myndavél á kvöldin. Gengur ekki að kúldrast við skrifborð allan daginn.
Úff, hvað ég er fegin að ég vinn ekki við skrifborð og sæki daglega fundi, svona venjulega.
Þetta er nóg svona að vori og hausti í nokkra daga í einu.

agenda

2005-05-30T00:46:00.000Z

Fundaseta framundan þessa vikuna, starfs- og frágangsdagar í vinnunni.
Skrítið að hugsa til þess að vera komin í sumarfrí eftir viku.
Skrepp með nemanda á Matthíasar Jochumsonar hátíð MENOR næsta sunnudag, svo er þetta bara búið.
Ekki amalegt svosem að spila í Safnaðarheimili Akureyrarkirkju eitt Andante eftir Benedetto Marcello til að slútta skólaárinu.
Í vikuna bætist háspennt tiltekt í húsinu; þarf að þrífa og ganga frá öllu, finna sumarfötin og þvo. Meðalhiti í Frankfurt þessa dagana um 30 gráðurnar og því þörf á öllu því sumarlegasta sem ég á. Flest allt grafið einhversstaðar neðst og aftast í skápum og skúffum.
Jú og svo er ég líka tvöföld í roðinu í vinnunni, þarf að ganga frá sem tónmenntakennari og líka sem tónlistarskólastjóri. Það er svolítið mikill frágangur.
Sérgreinakennarar í grunnskólum lenda yfirleitt einir í hryllilegum frágangi, þurfa að yfirfara bækur fyrir hvern einasta nemanda og taka til í draslinu einir.
Tónlistarkennarar þurfa að ganga frá ansi mörgu. Meðal annars það leiðindaverk blásarakennara að rífa í sundur og sótthreinsa hljóðfærin sem eiga að fara í notkun í haust og var skilað inn núna af áhugaskertum nemendum.
Gleymi aldrei þegar ég reif í sundur rúma tylft af flautum í Tónlistarskólanum á Akranesi, bæði til að skipta um púða, laga og þrífa/sótthreinsa. Fann hálfétna súkkulaði kúlu innan í einni flautunni, guð má vita hversu lengi hún hafði verið þarna. Ekki skrítið að flautan hafi verið eitthvað skrítin í stillingu í efri áttundunum.
Sem betur fer bara 2 flautur og eitt stykki saxafónn sem fara í hreinsun í vor.
Tónmenntakennarinn í mér þarf að fara yfir öll smáhljóðfærin líka og sótthreinsa, búið að slefa á þau og krafla, af fingrum allra barna sveitarfélagsins frá leikskólaaldri upp í nærri-menntskælinga. Og svo og svo og svo, allt afar leiðinlegt, eins og oftast þegar "taka til" kemur inn í setninguna.
Á miðvikudag eru skólaslit með verksýningu.
Valhópurinn sýnir þar hluta af lokaverkefninu, 1.-2. bekkur sýnir veggspjald með lengdarmælingum á rörunum sem málmblásturshljóðfærin eru búin til úr versus stærð barnanna í þessum bekkjum, 7.-8. bekkur með sýningu á grafísku tónhandriti fyrir 60 sekúndur kvikmynd.
Prófskírteini og vitnisburðir, námskeiðsstaðfestingarskírteini og fleira þarf að skrifa.
Aukatímar fyrir þessa sem eiga að spila á skólaslitum og fyrir MENOR, talning námsgagna og margt fleira þess háttar.
Nóg framundan.

Pakka ofan í tösku, tannlæknir og klipping, kaupa birgðir af kattamat og setja bensín á bílinn...

og og og og

Sei sei já

spikk og spam

2005-05-27T01:37:00.000Z

Mini kominn með glænýjan harðan og súmmar með ógnarhraða.
Húsfreyjan brosir út að eyrum.

upphitun

2005-05-25T22:40:00.000Z

Ísköld Riesling, kertaljós og smá undirbúningsvinna.
James Taylor á DVD, er að byrja að skrifa námsefni fyrir Valhópinn næsta vetur; Listir og Menning. Tónlist af hæsta gæðaflokki spilar þar stóran þátt. Líka myndlist, ljósmyndun, leiklist, danslist ofl sem má flokka undir listir og menningu. Hlakka til að takast á við breitt viðfangsefni (og örlítið breytt líka). Allavega ættu allir að geta látið ljós sitt skína í a.m.k. einum hluta í áfanganum.
Á eftir að horfa á sennilega ansi marga DVD diska og fletta enn fleiri bókum á meðan ég vinn les- og vinnuheftin fyrir unglingana.

Magnaður, gamli Taylor. Röddin betri nú en nokkru sinni fyrr. Lois Conte á slagverk...magnað alveg. Og þetta eru allt gamlir menn.

Riesling-ið er hluti af undirbúningsvinnu fyrir sumarfríið. Hita mig upp fyrir ferðir um Móseldal og Rínarhéruð. Niðurteljarinn á Dashboardinu í Tiger segir Þýskaland eftir 13 daga.
Kertaljósin með Citronellu til að bægja frá flugum, góð olía í brennaranum.

Mini-inn minn tók upp á að deyja, var víst með banvænan sjúkdóm strax í búðinni, harði diskurinn orðinn grautlinur og ónothæfur. Í andarslitrunum neitaði hann að opna augun/ræsa sig.

angist

2005-05-25T00:11:00.000Z

Góðum obba úr deginum eytt í hláturskasti við að taka myndir fyrir hraðkeppni.
Þemað Handklæði, til heiðurs Douglas Adams, og því nauðsynlegt að mynda handklæði við óvenjulegar aðstæður.
Módelið mitt átti erfitt með að halda alvörusvip á meðan ég lá fyrir framan hana skellihlæjandi.
Meira um það síðar kannski.
Önnur keppni liggur þungt á mér. Er búin að koma mér út í svona "dare" dæmi. Þemað alger viðbjóður sem gengur út á að senda af sjálfum sér mynd með tilhristar kinnar. En ég er víst búin að koma mér út í eitthvað sem ég bakka ekki út úr núna.
Spéhræðslan að gera mig vitlausa, enda fer það fáum að sletta kinnunum til og frá fyrir framan ljósopið.
Er samt að vonast til að hinn aðilinn gugni á undan mér.....

nagað

2005-05-23T23:59:00.000Z

Nú er ég komin með 6 flóabit á hægri fótinn og 13 á vinstri.
Sé fram á að hverfa með þessu áframhaldi.
Er farin að íhuga að kaupa mér svona hundaflóaólar, setja á sitthvorn öklann í hvert skipti sem ég þarf út fyrir dyr.
Íhugaði að hanna klóru úr gaddavír líka.
Baða mig upp úr flóasjampói fyrir hunda.
Kaupa mér Hazmat galla fyrir útivist.
Allt saman afar raunhæfar hugsanir þegar maður sér fram á að ganga um með skinnlausa leggi í sumar.

afslappað

2005-05-23T02:57:00.000Z

Deginum eytt í rólyndisdól við frostmark í firðinum.
Skrapp út á Hjalteyri og gekk þar um í á þriðja klukkutíma með hræðilegan hroll mundandi linsuvopnið.
Bæði kuldahroll og svo draugahroll.
Staðurinn ekki fólki bjóðandi nema í róandi félagsskap.
Allavega reis á mér hvert hár þegar ég gekk inn í yfirgefnar byggingarnar; eins og fólk hafi hætt í kaffipásu og ákveðið að skreppa heim og svo ekki söguna meir.

Við bryggjuna við gömlu húsin vögguðu engir bátar, bara skilti sem vöruðu við stórhættu á timbruðu yfirborðinu. Bátastaurar stóðu bísperrtir á móti þungbúnum himninum sem spýtti úr sér hagli og hríðarél.

vont veður

2005-05-22T02:11:00.000Z

Hríðar enn í Eyjafirði og deginum eytt í myndatökutilraunir og snurfus á myndasíðunni minni.
Ég er búin að borða svo mikið af ungbarnagulrótum með grískri ídýfu að mig svíður í munninn.

Og nei....ég horfði ekki á Eurovision.

Hér koma svo "best of" dagsins:

flassbakk og fleira

2005-05-20T23:49:00.000Z

Það er eins og Febrúar sjálfur hafi mætt á gúmmísólunum, hent sér yfir land og láð á ógnarhraða, svo að eftir hann liggur grámyglan sem varla sést í gegnum. Hríðarskot úr norðri og ströndin handan fjarðar hulin, sauðfé hímir í skjóli og húsfreyjan kveikir á kertum.
Flóabitin eru að gera mig vitlausa, svo að það hlýtur að vera vor.
Hundruðir páskalilja í fullum blóma í beðinu austan við, sumarkjólarnir hanga á snúrunni niðri og sandalarnir nýpússaðir á skógrindinni.
Þetta stenst engan veginn.

Ein kennsluvika eftir af skólanum, svo tekur við vika full af fundum og öðru skemmtiefni. Er búin að gefa einkunnir og umsagnir til tónlistarnemendanna, er með þetta allt læst ofan í skúffu þar sem þetta verður ekki kunngjört persónulega fyrr en á skólaslitum. Flestir stóðu sig vel, sumir með mesta sóma, aðrir með aðeins minni. Skuldbindingahnúturinn ekki jafn hertur á milli bæja og þolinmæðin og iðjusemin ójafnt gefin.

Kláraði hrinuna af Karókí námskeiðunum núna á fimmtudaginn.
Ótrúleg þátttaka; ætlaði bara að vera með 1 námskeið/1 hóp en þurfti að splitta þessu í 3 hópa með 8-10 manns í hóp. Yndislegust voru börnin í yngsta hópnum, ein fékk tár í augun af eigin framistöðu og önnur fékk hroll ítrekað á sviðinu yfir eigin söng.
Eini drengurinn í hópnum bræddi mig og mömmurnar sem komu á lokadaginn með flutningi á Love me Tender, með leikrænum handarhreyfingum frá sínu hjarta og út í sal með hverju Love í laginu.
Ein mætti í eldrauðum síðkjól til að undirstrika dramað í One day I´ll fly away úr Moulin Rouge, ótrúlegt lagaval hjá 9 ára gömlu barni, en hún söng þetta með miklu drama, sé hana fyrir mér í álíka kjól eftir 30 ár stingandi sig í hjartastað (með gerfihníf að sjálfsögðu) í full-dramatískri aríu á sviði fyrir framan breiðari áheyrendahóp.
Húsfreyjan steig svo sjálf á svið í lok námskeiðsins og söng Dancing Queen með brillíant bakröddum....maður verður að vera með ;-)

Sauðburði er offissíelt lokið, síðasta lambið fæddist í hádeginu. Nú getur hún frænka mín sofið frameftir, eða í það minnsta sofið heila nótt í einum rykk.
Vorverkin bíða, glittir í þau útundan mér; uppvafinn akrýldúkur, áburður, mold og fræ. Í höfðinu útreikningar fyrir fjölda af stjúpum sólboðum og gullsópum. Allt saman tilbúið þegar þarf.
Eða öllu heldur þegar ég sé yfir fjörðinn aftur.

Slappt

2005-05-20T22:31:00.000Z

Þorir enginn að segja að íslenska lagið fyrir Eurovision var einfaldlega ekki nógu gott?
Óþarfi að vera að fara út í samsæriskenningar eða skítkast út í aðrar þjóðir að hætti Gísla Marteins.

Ég verð að segja að ég er ekki Eurovision aðdáandi, hef ekki horft á eina einustu keppni síðan ég óverdósaði þarna um árið þegar Riverdance sló í gegn. Var pínd í Sjónvarpshúsinu frá 9 um morgun allt framundir miðnætti, þurfti að horfa á lögin aftur og aftur, lesa textana, sjá myndböndin, horfa á gerfi rennsli og gefa gerfi stig. Þetta var ógeðslega leiðinlegt. Og ég mátti ekki fara á klósettið á meðan að á keppninni sjálfri stóð, það stóð lögga við dyrnar og passaði að enginn myndi nú svindla. The Icelandic Jury.....
Minnir að við höfum verið 4 sem representeruðum tónlistarmenn í þessari dómnefnd; ég, Níels Ragnarsson, Sigurjón Kjartansson og Emelíana Torrini. Þá var Sigurjón ekki með fyndnisstimpilinn og Emelíana var nýbúin að vinna söngvakeppni í MK held ég. Gætu hafa verið einhverjir fleiri álíka obskúra músíkantar og ég og lítið látið fara fyrir sér innan um pappírsbunkana í myrku stúdíóinu.

Annars er ég svo gömul að ég man ekkert nema pyntingarnar og að í mötuneytinu uppi á efstu hæð var hrísgrjónagrautur í matinn.
Þegar Sirrí var búin að þylja "Good evening, those are the results of the Icelandic Jury" þá mátti ég fara á klósettið.

Á Talstöðinni í dag var lítið um annað rætt en hvað ætti aumingja fólkið nú að gera sem hefði ætlað að halda Júróvisjón partí.

Jú ok.....flestir Íslendingar undir 15 ára aldri grétu í gærkvöldi, ég veit.

Ég viðurkenni að ég horfði ekki á neitt af þessu nema bara skrollið í gegnum hælætin úr hverju lagi með símkosningarnúmerunum.

Af þeirri kynningu dró ég afar merkilega ályktun:
Noregur RÚLAR!
Heija Norge!!

meee

2005-05-19T17:44:00.000Z

Það er allt að verða búið í sveitinni bara.
Me og meira me vekur mig og svæfir fyrir utan gluggann.
Verst með þessa ísköldu norðanátt.

upp

2005-05-17T00:56:00.000Z

Ef það er ekki upp a við þá er það áfram.
Sennilegast það versta sem við gerum er að horfa afturábak og einblína á það liðna. Eins og að ganga niður stiga afturábak með bundið fyrir augun og ekkert handrið.
Lærum lítið af því nema að það er miklu miklu betra að fara áfram, halda í handriðið þegar það þarf. Og bíða spennt eftir því sem bíður við endann.

úff

2005-05-16T22:22:00.000Z

Búin að missa af lestinni í ljósmyndakeppnunum undanfarið, hugurinn verið fastur við pappírsbunka og frágang. Nemendurnir langflestir haldnir út í vorið með bros á vör. Lang flestir búnir að koma bókunum vel fyrir á góðum stað, þar sem þær eiga því miður eftir að liggja óhreyfðar fram á haust. Sumar bækurnar liggja sennilegast óhreyfðar lengur en það.
Aðrir horfa fram á þrælaprógramm, búið að sjá fyrir því að sumarið líði ekki án þess að svitna yfir tækniæfingum og nýjum verkum.
Brjálæði vordaga nærri að baki og fer að líða að aukinni tíðni bloggskrifa aftur, vonandi.

splat

2005-05-11T17:44:00.000Z

Fyrsta flugan splundraðist á framrúðunni á leiðinni í vinnuna.
Það er komið sumar.

richter

2005-05-09T23:49:00.000Z

5 á Richter með Nylon er hryllilegt lag.
Er með Karaókísöngnámskeið núna í vikunni. Flestar stúlkurnar völdu sér það og eftir nokkrar umferðir sá ég að drengirnir voru farnir að hreyfa varirnar með.....

Gat ekki annað en hlegið hrossahlátri þegar ég horfði á eina af stúlkunum í Það var lagið sl. helgi.
Hún vissi að forspilið var Your Song með Elton John.
Hún kunni lagið.
Hún kunni textann (allavega fyrstu línurnar).

Verst var þetta með að hitta engan veginn á sömu tóntegund og spilað var í.
Munaði ekki tvíund, ekki þríund....ekki einu sinni exótísku kvarttónsbili.
Munurinn var svakalegur. Hvort sem mældur er í tónbilum eða fjölda hára sem risu á höfðum hlustenda.

Ég hló

Hún hló, hún hló, hún skelli skelli hló

Er farin að upplifa mig eins og Simon Cowell í kennslunni. Hefði eflaust átt ágætis frasa, vel brúklega, ef að nemandi hefði skotið svona yfir í tíma hjá mér. Hvort sem það væri í tónmennt í 3. bekk eða tónheyrn.

.....múhahahaha.....

mai

2005-05-05T13:12:00.000Z

Löng helgi hjá mér.
Nóg af þeim þessar síðustu og komandi vikur.
En nóg framundan.
Verð með 3 námskeið í raddbeitingu og míkrófón söng núna í maí. Ætlaði að vera bara með eitt, en aðsóknin varð svo gífurleg að ég varð að splitta þessu upp í 3 10manna hópa.
Lok skólaársins og allt sem því viðkemur, er búin að sitja sveitt að semja Handbók/Námskrá fyrir tónlistardeildina. Þarf svo að garfast í frágangi og undirbúningi fyrir næsta vetur, bæði sem deildarstjóri og svo sem leiðbeinandi í tónmennt. Geðklofasyndrómið á fullu flugi þá daga.
Emblutónleikunum sem áttu að vera í lok maí var frestað fram á haust, svo að þá hægist aðeins um síðustu vikuna í maí.
Matthíasar Jochumsonarhátíð MENOR í byrjun júní, fer með nemanda þangað. Stúlkan fær að spila í akústískt sérhönnuðu Safnaðarheimilinu í Akureyrarkirkju. Ágætis tilbreyting frá því að spila í dauðri kennslustofunni eða glymjandi íþróttasalnum.
Nota svo tímann um mánaðarmót til að undirbúa mig undir langar setur á vínekrum Móseldalsins og skoðunarferðir um Thuringenskóg. Mikið hlakka ég til!

val

2005-05-04T23:57:00.000Z

Unglingarnir í Tónlistin og við, valáfanganum um rokktónlist í 9. og 10. bekk, skiluðu af sér lokaverkefninu í gær.
Ég táraðist.
Og átti erfitt með andardrátt í smá tíma.

Verkefnið var í formi fyrirlesturs, 2-4 nemendur saman í hóp.
Þau áttu að búa til ímyndaða hljómsveit, með sjálfum sér sem meðlimum eða upphugsuðum fantasíukarakterum. Inn í fyrirlesturinn átti svo að fléttast allt sem þau hafa lært í vetur; ferill hljómsveitar, æviágrip meðlima, fyrstu tónleikarnir, fyrsta tónleikaferðalagið, plöturnar og lögin, (ímynduð) blaðaskrif og gagnrýni, rider skjöl frá manager til tónleikahaldara osfrv. Kostur var ef nemendur nýttu sér grafík og hljóð í bland.
Einn hópurinn gekk svo langt að skjóta af sér myndir í ýktum glamrokkstíl, myndir sem hefðu sómt sér vel á síðum hvaða tískutímarits sem væri......ef ekki hefði verið þessi sýrði geggjaði glampi í glottinu á öllum myndunum.
Annar hópur gerði kreditlista yfir rosa rokkmyndband til að enda fyrirlesturinn.
Hópurinn sem kallaði sig Hina Heilögu Munka endaði fyrirlesturinn með Power Point showi um daglegt líf músíkalskra munka.
Það var mikið um myndir af hrísgrjónum og einhverjum lúðum í tjaldi að spila skák, inn á milli voru biskupar með geðveiki í augnaráðinu otandi mítrunum.
Ég fékk að sjá geisladiska cover og tónleikaauglýsingar.
Einn riderinn tiltók 3 kg af súkkulaði rúsínum í búningsherbergi, með rúsínunum plokkuðum úr.
Annar rider taldi sér búningsherbergi sem var kallað Jarðaberjaherbergið.
Þar voru allar mögulegar jarðarberja-afurðir. Líka grænir gúmíbangsar með jarðaberjabragði.

Hef sjaldan skemmt mér jafnvel við skil á lokaverkefni hjá nemendum.
Nú er að setja höfuðið í gang og upphugsa valáfanga næsta veturs.

jaaaaa

2005-05-04T01:15:00.000Z

Sé á Site Trackernum að einhver hefur villst inn á bloggið mitt af Google eftir að hafa slegið inn leitarþráðinn Saga sultunnar.
Jahá......
Ég bara veit ekki hvað ég á að segja.

safnast saman

2005-05-03T20:03:00.000Z

Lóurnar eru að hópa sig saman, um það bil 300 á túninu ofan við hjá mér.
Boðar víst kulda, hret og norðanátt.

Mér líst ekkert á þetta.

brotlentur

2005-05-01T23:58:00.000Z

Veðrið í kvöld var alveg yndislegt, þrátt fyrir að vera 10 gráðum of kalt. Klæddi mig vel og fór í göngutúr, gekk um svæði hér rétt hjá þar sem ég hef aldrei komið áður. Úr alfaraleið og einhvernveginn ekki leið sem ég hefði fundið upp hjá sjálfri mér nema bara afþví að veðrið var svo gott og ég ákvað að sveigja upp úr fjörunni.
Við sjávarmálið syntu æðarfuglar, stelkur og tjaldur kölluðust á og mávar héldu þing á sandeyrum.

Innan um fjörugrjótið fann ég framliðinn himinfara.
Eins og brotlentur engill og snjóhvítar fjaðrirnar lýstust upp í kvöldsólinni.

husfreyju radio

2005-05-01T13:18:00.000Z

Tveir snilldar diskar sem ég hef komist yfir nýlega:

Hang on Little Tomato - Pink Martini
Frábær blanda af öllum mögulegum stefnum í heimstónlist.

Got you on my mind - Madeleine Peyroux
Minnir á Billie Holiday. Eitthvað afskaplega notalegt við röddina hennar, Jai´s Deux Amours minnir mig á heit sumarkvöld við opinn glugga.

Það er að koma tími aftur þar sem ég hlusta á tónlist allan sólarhringinn. Á meðan ég er í fullri kennslu yfir veturinn þá get ég bara ekki hugsað mér að setja neitt á fóninn þegar ég kem heim á kvöldin. Meira að segja sjónvarpið fær frí flest kvöld.

verkfærataska heimilisins

2005-04-30T21:05:00.000Z

eða
Að festa skrúfu í vegg.

Ég fæ einhvern undarlegan barnatíma fílíng þegar þessar Húsasmiðjuauglýsingar koma á skjáinn.
Eitt af því sem fer afar mikið í taugarnar á mér er þegar er talað niður til fólks.
Það hefur aldrei fengið mig til að vilja versla við fyrirtæki.
Í verkfæratösku heimilisins fara teiknimyndir af hamar, skrúfjárni, nöglum og borvél.

Ég á ekki svoleiðis verkfæratösku.

brot

2005-04-29T23:52:00.000Z

Jæja, þá tókst mér að mölva í mér tennur með mjólkurkexáti.
Allt er nú til.

hvað er ges moll?

2005-04-28T18:12:00.000Z

Hef oft velt fyrir mér nokkru sem ég rekst reglulega á.

Hvernig er hægt að útskrifa nemenda í tónlistarnámi án þess að hann kunni að lesa nótur þokkalega,
án þess að hann kunni undirstöðuatriði í tónfræði/hljómfræði,
með yfirferð sem samanstendur eingöngu af þeim verkum sem hann hefur flutt á prófi?

Ég hlýt að vera martröð allra nemenda og kennara þegar ég prófdæmi.
Ég bið um yfirferðarlista, ég spyr nemandann spjörunum úr um tóntegundirnar sem hann spilar tónstiga og verkin í, ég spyr hvenær hann hafi hafið nám, og ég vil fá að vita hvað nemandinn hefur æft prófverkefnin lengi.
Fyrir mér er yfirferð stór hluti af því að hafa skilning á tónlist, ég tel það ekki vera neitt merkilegt að nemandi geti spilað lög á prófi vel ef það hafa verið einu lögin sem hann lærði allan veturinn.
Mannveran hefur smíðað róbóta sem geta þetta líka.
Nótnalestur í klassísku námi og skilningur á uppbyggingu (tónfræði og hljómfræði) er absolútt atriði sem sköpum skiptir ef viðkomandi ætlar sér að starfa sem klassískur tónlistarmaður (og getur verið fyrir hina munurinn á að fá verkefni eða vera ekki beðinn).
Án þess mun nemandinn aldrei geta bjargað sér sjálfur, útskrifaður eður ei.

Hvað þætti mönnum um ef leiklistaskólar færu að útskrifa ólæsa leikara sem hefðu æft sömu rulluna endalaust og þekktu ekkert til annara leikverka?

Rekst á þetta alltof oft.
Tel ekki að nokkrum sé greiði gerður með instant mix námi.

designer

2005-04-28T15:33:00.000Z

Mér finnst þetta hér frekar óhugnanlegt.

Löglegt að búa til sérhönnuð systkini
Bresku Lagalávarðarnir, sem samsvara hæstarétti landsins, úrskurðuðu í morgun að það væri löglegt að búa til sérhönnuð börn með sérstaka erfðafræðieiginleika sem hugsanlegageta nýst við meðhöndlun veikra systkina þeirra. Dómararnir fimm staðfestu þar með dóm undirréttar einróma en með úrskurði undirréttar féll bann við nýtingu erfðafræðirannsókna og tæknifrjóvgunar til að búa til sérhönnuð börn úr gildi.

Málið kom upp er hjónin Raj og Shahana Hashmi óskuðu eftir aðstoð við að geta barn sem hefði erfðaeiginleika sem gætu nýst við meðhöndlun ungs sonar þeirra sem þjáist af sjaldgæfum, banvænum blóðsjúkdómi. Eftir að undirréttur hafði dæmt í málinu hlutu þau þá aðstoð sem þau fóru fram á en málið fékk þó skjótan endi er frú Hashmi missti fóstur.

Jú, mikið gott ef að læknavísindin geta aðstoðað við að meðhöndla erfðasjúkdóma.
En ég veit ekki hvort að er rétt að vera að búa til börn til þess að lækna önnur börn.
Er haldin þeirri gamaldags hugsun að börnin skulu búin til þeirra vegna, ekki annara.
Og ef að á að leyfa þetta, afhverju má þá ekki aðstoða fólk, sem getur kannski með mikillri heppni, tækniaðstoð og mörgum tilraunum aðeins eignast eitt barn, til þess að nærri tryggja að það barn verði heilbrigt.

Siðlegt eða siðlaust. Eflaust skiptar skoðanir, jafnvel hjá sömu manneskjunni.
Ég er varla búin að átt mig á hvað mér finnst um þetta annað en að það er eitthvað við þetta sem ég kann ekki við.

rafmagnsnikka

2005-04-28T00:53:00.000Z

Fer að fá leyst úr vandamálum mínum við að lafa á netinu með stöðugleika. Rosalega verð ég fegin.

Ég er dottin í að hlusta einungis á electrotango þessa dagana, Gotan Project hljómar í bílnum, vinnunni og heima.
Piazzolla style nikka í bland við trip hop/techno/jazz/house eða hvað sem þetta er nú allt kallað.
Mæli með að tékka á þessari síðu. Þar er hægt að fá tóndæmi.
Húsfreyjan stígur fönkí tangó.
- innan í sér.

Undirbúningurinn fyrir vortónleikana í hámarki, generalprufa á föstudag og pizzuveisla á eftir. Ætla mér ekki að opna á mér munninn meira en ég þarf á tónleikunum og ákvað því að hafa prentaða efnisskrá. Börnin þurfa að æfa innkomur, útgang og bugt og beygingar skv. kúnstarinnar reglum svo að þetta renni allt eins og "bráðið smjör".
Hef á tilfinningunni að ég eigi samt eftir að þurfa að hnippa í nokkra. Sumum myndu ekki nægja tugir rennsla og æfinga, hugurinn hálfur einhverstaðar annarsstaðar og hinn helmingurinn upptekinn við háfleygar hugsanir alls ótengdum tónleikum.
Ég hnippi þá bara....prófa samt stingu-augun fyrst.
Þau virka stundum ágætlega.
Foreldrafélagið stendur sveitt og bakar dýrindis kræsingar fyrir kaffihlaðborðið, tertur, smur- og rjóma, heita rétti, kleinur og kökur. Eyrnakonfektið baðað í kaffi og hnallþórum eftir síðasta lag.

4 lömb komin í heimin handan hlaðsins og um stofugólfið ráfar áttavilltur járnsmiður. Lagður í langferð undir árvökulum augum ferfætlinganna. Þau finna það á sér að hættan á að fari að rigna er áþreifanleg. Engin morð framin í kvöld á meðan að er beðið um sól og heiðan himinn á morgun.
Væri ekki verra ef að hrossagaukurinn heilsaði mér líka í fyrramálið þegar ég mæti til vinnu.

hreint

2005-04-26T20:42:00.000Z

Blómlegt um að litast í beðunum hjá mér, undir öllu ruslinu. Á dagskrá að tína saman sprekin og gera hreint.
Frostmark í spákortunum fyrir sunnudag og mér hætt að lítast á blikuna.
Kannski ég ætti að skutlast út með skærin.

brum

2005-04-25T23:34:00.000Z

Heiðblátt í morgun.
Hvítgráar slæður í kvöld.

Búin að gera lítið annað en að blóta myndavélinni minni. Hryllingur að eiga gamla al-átómatíska vél.
Hér á ekki við að ræðari kenni árinni. Nema ef ræðarinn er kappróðramaður vopnaður tennisspaða.
Nýjasta keppnisþemað er DOF, s.s. myndir með litla dýptarskerpu.
Mér er ekkert að ganga of vel með þetta, ekki eins og ég vildi. En það er bara gaman, þá æfir maður sig meira.

Þyrfti helst meiri tíma, s.s. með dagsljósi.
Maður þarf og maður þarf.
Gleymir oft og iðulega að nýta sér það sem maður hefur.

Í eigin fjötrum.
(ég varð að finna eitthvað til að segja til að skella inn þessari mynd hér....)

Góðar stundir.

sumarbyrjun

2005-04-24T19:34:00.000Z

Löng helgi liðin.
Sumardagurinn fyrsti er fermingardagur hérna í sveitinni og frí í skólanum þann dag og föstudaginn.
Svoleiðis á þetta að vera.
Fagna sumri og hafa til þess nokkra daga.
Helgin nýttist í afslöppun, uppgerð á bílnum, samantekt ferðaáætlunar snemmsumars og bókanir, actionary fram undir morgun með góðu fólki, skreppitúr í Skagafjörð og legið frameftir við opinn glugga og hlustað á fuglasöng.

Framundan löng og stór vika, vortónleikarnir eða uppskeruhátíð tónlistarnemendanna næstu helgi með generalprufu og pizzuveislu og öllu tilheyrandi.

Gleðilegt sumar!

hlekkur

2005-04-24T18:46:00.000Z

Var að setja inn hann Gunnar Ben í Bloggara hér til hliðar. Hann var í blásarasveit með mér hér í denn, þá var hann bara pínulítill og spilaði á óbó. Núna spilar hann á ýmislegt fleira og er víst orðinn fullorðinn.....eins og við flest.

muna sinn....

2005-04-19T01:14:00.000Z

Hallaði mér upp að stafni húss sem muna hefur mátt sinn fífil fegri.
Horfir út fjörðin, með neglt fyrir augu, brostnu augnaráði, sleikt að utan af eldi og tímans tönn.
Yngri útgáfa stendur nokkrum metrum vestar, starir tómum augunum út á sama fjörðinn, snýr baki í fortíðina á meðan að hrossin nudda sér upp við skakkar þvottasnúrurnar.

Þegar ég var lítil stelpa bjó þarna kona með dóttur sína, skólabíllinn puðaði í gegnum þykka skaflana til að sækja stúlkuna í skólann. Mér fannst alltaf eins og hún byggi á afskekktasta stað jarðríkis, galopnum fyrir nístandi norðanáttinni og ekki göngufæri á næsta bæ. Þegar ég kom þarna í dag fannst mér þetta vera einn af dapurlegustu stöðum í Eyjafirði.
Í depurð er þó alltaf einhver viss fegurð.
Kannski lítur þetta allt öðruvísi út þegar sólina ber við þakskeggið og ekkert heyrist nema hneggið í hrossagauknum.

Tékka á því síðar.

afturganga

2005-04-18T20:42:00.000Z

Í gráu vorinu skrapp ég í bíltúr á milli kennslu og fundar, keyrði eins og leið lá norður með strönd og inn í næsta hrepp.
Víkurskarðið til hægri, hátt ofan við og hross á beit, við sjóndeildarhringinn Kaldbakur, fyssandi brimið niður við sjóinn.

Í vegakanti yfirgefnar leifar Auðar Annarar, jarðneskar leifarnar búnar að fá nýtt hlutverk og blómskrúðið leyst af með upprúlluðum sumarslætti í hvítu plasti.
Maður mætir draugum í Grýtubakkahreppi.
Meira að segja á mánudegi.

nesti

2005-04-17T17:03:00.000Z

Kolsvartur fjörður og himininn skiptist í tvennt, svartur á móti heiðum með sólarglætu. Frænka fimmtug og ég komin í fínu fötin.
Farin að ferðast í huganum út í heim, sest niður við fjallavatn og anda að mér sólskini undir skugga Alpafjalla. Nesti og nýir skór inn í sumarið sem er handan við hornið.
Lautarferð með draumkökum og þykkt smurt með tilhlökkun.

Ég er viss um að í sumar á ég eftir að verða hissa.

tjattið

2005-04-16T17:03:00.000Z

Ég sé að fleirum er hugleikin notkun MSN en mér. Orri bloggar um MSN og ég hef ekki fengið eins mörg komment á færslu í mínu bloggi í dágóðan tíma.
Ég hef velt þessu þó nokkuð fyrir mér, hvernig við notum MSN.
Ég held að það sé ekki til neinn einn staðall fyrir hvernig á að nota þennan annars stórfína spjallserver.
Nota bene-spjall server. MSN er ekki forrit, en MSN Messenger er forrit.
Við sem ekki viljum sjá Microsoft viðbjóðinn í tölvunum okkar notumst við m.a. AdiumX, Mercury Messenger og Fire til að komast inn á spjallþjóninn. Ég er búin að prófa þessi forrit, ásamt MSN Messenger.

AdiumX
Snilldargott forrit sem er hægt að laga að eigin þörfum. Plúsarnir við það eru margir, það er hægt að setja á Away Autoreply og setja þá inn þann texta sem maður vill að viðmælandi fái í sjálfvirkri svarsendingu ef maður er ekki staddur við tölvuna, það er hægt að stilla á allan mögulegan hátt hvernig maður vill að gluggarnir og contact listinn líti út. Það er hægt að sjá þegar viðmælendur eru Idle, hvenær þeir verða virkir aftur og hvenær þeir loka samtalsglugganum.
Mínusarnir eru nokkrir, það er ekki hægt að setja á BUSY, það er ekki hægt að blokkera, það er stundum erfitt að tengjast MSN servernum og það er ekki hægt að gera Appear Offline.
Annars mjög stabílt og númer eitt hjá mér.

Mercury Messenger
Mjög flott útlítandi, en með fullt af göllum.
Helstu gallarnir eru að það er ekki hægt að skrifa ý, ó, í, ú, á. Sem er glatað.
Það er hryllilega lengi að ræsa sig. Hef ekki nennt að prófa það almennilega út af stafaveseninu.

Fire
Var númer eitt hjá mér áður en ég uppgötvaði AdiumX. Var frekar óstabílt í tengingu við server, þó 100% stabílt í tengingu við ICQ serverinn. Hafði allar sömu stillingar og MSN Messenger og leit afar svipað út.

MSN Messenger
Microsoft virðist halda sig við að gefa Makka notendum fornaldarútgáfur af forritum með aðeins 50% af fídusunum sem PC notendur fá. Hryllilega óstabílt á Makka, skelfing að geta ekki tjattað í Tabs. Síðasta sort hjá mér.

Við höfum öll okkar eigin forsendur fyrir því hvernig við notum spjallforrit. Umræðan hér á netinu svo og í kjötheimum undanfarið hefur snúist ansi mikið um afhverju fólk stilli þennan eða hinn statusinn á sig, afhverju maður segist vera away, eða sýnist offline þegar maður er á staðnum.
Vinkona kom með mjög góða útskýringu á þessu.
Ef maður fer út í búð eða í bæinn og er ekki í spjallstuði þá hefur maður val á að segja snöggt hæ ef maður mætir einhverjum sem maður þekkir og ganga svo í burtu. Viðkomandi sér eða finnur það strax að "hæ" er allt og sumt sem hann fær og það þarf ekki að útskýra það meir. Í netheimum er þetta ekki hægt þar sem manneskjuvíbrarnir ná ekki að yfirfærast í gegnum tölvurnar. Stundum langar mann bara til að sjá lífsmark á tölvuskjánum án þess að vilja spjalla við nokkurn.

Ég er algerlega sammála þessu.
Ég segi fyrir mitt leyti að mér þykir afar notalegt að sjá umferð hinna lifandi á meðan ég dútla við vinnu eða lestur á netinu. Þykir gott að sjá þetta eða hitt nafnið dúkka upp á skjánum, svona rétt til að sjá að þessi eða hin/n sé lifandi. Eins og að sitja við opinn glugga við fjölfarna göngugötu.

Svo snýst þetta líka voðalega mikið um að velja sjálfur hvern maður talar við.
Það væri ansi sniðugt að geta tekið með sér skilti á kaffihús, skellt einu Appear not to be here upp á borðið við hliðina á kaffibollanum og getað setið einn með sínum hugsunum óáreittur en notið þess jafnframt að vera ekki einn á staðnum.

Ég hálfpartinn sé eftir að hafa skrifað þennan póst um daginn, ég kom af stað fílósófískum umræðum hjá vinum og kunningjum, vangaveltum um hvort netið ætti að nota samkvæmt reglum, hversu margir yfirfæri raunheimaumgengnisreglur á rafræn samskipti, hvort að þetta væri ekki eins og einhverskonar eþer tengdur ímyndun(grínlaust, sú umræða kom upp).
Hefði verið ákjósanlegra ef umræðurnar hefðu snúist um eitthvað mikilvægara en notkun tölvuforrita.

vorverk

2005-04-16T15:26:00.000Z

Þrestirnir mættu í garðinn hjá mér í vikunni, nokkur hundruð stykki í einu og syngja eins og vitlausir, meira að segja í myrkri.
Það er fátt yndislegra en að vakna hægt og rólega, opna alla glugga og hleypa inn söngnum, drekka kaffibolla úti á tröppum í 14 stiga hita og stökkva heljarstökk innan í sér því að það er komið vor.
Leita að grænu þar sem haustlaukarnir voru settir niður, plana í huganum hvar á að stinga vorlaukunum og sumarblómum. Ákveða að núna þurfi að hreinsa úr beðunum og lóðinni eftir veturinn. Muna svo eftir því að hjólbörurnar eru ónýtar.

Ég tek ofan fyrir Office1Superstore. Kominn tími á að hægt sé að kaupa tímarit hér á Íslandi án þess að maður sé að eyða meiri peningum en færi í bók. Keypti mér í fyrsta skipti frá því ég var unglingur tískutímarit. Nú vona ég að þeir selji Home&Garden, Country, Bolig Magasin eða Living. Væri meira að segja ánægð með Mad og Bolig.
Fékk gefins 30 árganga af Bo Bedre, sorteraða og innpakkaða í kassa. Gæti samviskusamlega hent kössunum frá ca. 77-85, nema kannski jólablöðunum, rosalega var allt ljótt á þessum árum. Brúnt, mosagrænt og appelsínugult, svo kom uppatískan, skurðstofustemning. Og Newton´s vagga á hverju borði.

Rakst á frábært forrit fyrir okkur sem erum að keyra Mac OSX 10.3 og treystum okkur ekki í að fara að fikta í Unix til að fiffa smá vélarnar.OnyX er málið, renna öllu í gegn sem hægt er þarna, mæli líka með að stilla gluggahleðslutímann í Safari á Fast í staðinn fyrir þetta default normal.
Svo eru bara 12 dagar í Tiger.........spennó spennó.

Flugleiðaþota æfir aðflug að Akureyrarflugvelli, flýgur í óteljandi hringi yfir húsið mitt. Það þyrfti að vera æfingaflugvöllur uppi á hálendi. Þetta getur varla talist boðlegt íbúum nokkurstaðar.

Stigsprófadagur á mánudag hjá mér og nemendunum. Allir löngu tilbúnir til að taka prófið þó næstum allir myndu þeir vilja hafa nokkrar vikur enn, ef ekki nokkra mánuði. Taugarnar farnar að þenjast pínu, alltaf erfitt að þreyja stigspróf; spila fyrir einhvern sem maður hefur kannski aldrei séð vitandi það að fylgst er vel með öllu sem gert er. Ég er búin að reyna að segja þeim samt að prófdómarar fæstir gefa fyrir það sem er vitlaust eða illa gert, það er gefið fyrir það sem er vel gert og heildarmyndin skiptir miklu máli, ekki ein taugatengd feilnóta.
Er það ekki annars?
Tími stigsprófa sem voru eins og aftaka hlýtur að vera liðinn.
Þó að mig gruni að með tilkomu prófanefndar og nýju prófakerfi sé verið að innsetja gamlar hefðir með magapínu, hand- og varaskjálfta og tilheyrandi. Þó svo það sé ekki ætlunin, þá man ég vel hvað mér fannst hryllilegt að taka píanóprófin með alla píanókennara skólans mætta til að hlusta á. Þverflautuprófin voru bara kammó í samanburði, gott að spila fyrir einn prófdómara, slæmt að spila tónstigana fyrir heila hersingu fólks. Tónleikar pís of keik enda engir tónstigar spilaðir þar. Merkilegt að flestir ef ekki allir prófnemendur kunna tónstigana sína best en eru samt hræddastir við þá.
Allir eiga sína uppáhalds hryllings-tóntegund, mín var af einhverjum ástæðum As dúr. 3 bé buðu upp á að inn á milli slæddist des eða ges, óvart. Þverflautunemendurnir mínir fölna upp þegar þeir þurfa að spila krómatík, merkilegt nokk eiga þeir eftir að spila hana bundið á ofsahraða sér til skemmtunar í upphitun eftir nokkur ár.
Þetta er allt að verða búið. Vortónleikarnir eftir 2 vikur. Tíminn líður ansi hratt eftir Sumardaginn Fyrsta.
Í maí kaupi ég mér sumardekk og hjólbörur.

gullfell

2005-04-12T22:58:00.000Z

Rosalega eru Goldberg varíasjónirnar hans Bach flottar.
En erfiðar.
Ég held ég sé orðin klikkuð að reyna að skemmta sjálfri mér með þeim.
Ljósi punkturinn er þó að það ætti að halda mér upptekinni lengi. Mjög lengi.

upplysingaöld

2005-04-12T00:15:00.000Z

Á þessum tímum erum við öll svo vön því að vera í stöðugu sambandi við umheiminn. Hvort sem það er innilegu sambandi eða svona fjarrænu og hlutlausu eins og í gegnum bloggskriftir. Við sendum frekar SMS eða skilaboð á MSN frekar en að taka upp tólið.
Margir telja líka sjálfsagt að hafa "samband" hvenær sem er að sólarhringnum, þó svo að fæstum dytti í hug að hringja í fólk seint að kvöldi. Erum við kannski orðin örlítið brengluð í þessum elektrónísku samskiptum okkar?
Mér finnst ekki allt í lagi þegar síminn hjá mér hringir eftir miðnættið, og hljóma sennilega álíka og ef ég ætti ættir að rekja niður til Heljar þegar ég svara í hann á þeim tíma sólarhringsins.
Það þarf að liggja mikið við; bráður lífsháski, mikil neyð eða vá fyrir dyrum svo að ég sjái það sem eðlilegan hlut.
Meira að segja þó ég sé vakandi og á fótum.
Ég geri það eftir margra ára þaulhugsun og útpældar tilraunir að vaka frameftir við vinnu. Ég geri það einmitt afþví að þá er best næðið og enginn sími til að trufla.
Mér finnst það sama gilda um rafrænar sendingar.
Síminn smellur og víbrar á borðinu á ókristilegum tíma og ég dreg upp úr vasanum ófrýnilegt hornaugað, þetta sem ég geymi til að nota spari.
Merkilegt líka með kerfið á MSN sem ég hef notað samviskusamlega í vinnunni. Smelli mér á BUSY þegar ég er bissí. Fátt meira pirrandi en blikkandi tölvuskjárinn gersamlega úr takti við spilandi nemandann.
Og Rauða og hvíta BUSY skildið lafir á MSN kallinum.
Away hefur þýtt í burtu/ekki viðlátin(n) eins lengi og ég hef talað ensku.
Idle er flóknara mál, oft þýðir það að viðkomandi er við tölvuna, en er ekkert að gera. Gæti jafnvel hafa farið í kaffi, eða verið að spjalla um mikilvæga hluti við yfirmenn og undirmenn; á óformlegum fundi.
Múdkiller dagsins er blíbbið í tölvunni og blikkandi gluggar, klikk og titr í síma. Vitlaust númer klukkan 3 að nóttu varla fyrirgefanlegt.
Einu sinni lagði gamall maður það í vana sinn að hringja í mig klukkan 6:30 að morgni og spjalla við mig um bústörf. Hann var sennilegast löngu hættur að stússast í þeim sjálfur. Ég hafði gaman af þessu í eitt skipti, tvö og kannski þrjú (ef hart er lagt að mér). En eftir rúmar tvær vikur þótti mér nóg um og varð að taka á honum stóra mínum og biðja aldraðan bóndann fyrrverandi að hætta að hringja svona snemma, ég yrði nú að fá minn svefn. Benti honum líka á að ég héti ekki Guðlaug.

Ég vildi stundum óska að tæknin væri komin svo langt á leið að hægt væri að hringja í * 666# til þess að á númerið mitt kæmi sjálfvirk símadama á milli 23:00 og 09:00 sem segði blíðlega:

"Þú getur alveg hringt á morgun. Ef þú heldur að þú sjáir ekki morgundaginn, þá ættir þú að vera að hringja á sjúkrabíl"

Að SMS væru send átómatískt til baka með refsiákvæði; læst fyrir sendingar í viðkomandi númer næstu vikurnar.
Að MSN hellú og ertu bissí væru svarað með sjálfvirku risa skilti (Busy skiltið eða Away klukkan) sem fylli upp í skjáinn, svona til þess að árétta.
Alveg eins og að fara yfir götu. Fyrst að líta til...erm....hægri..svo vinstri og svo aftur hægri. Svo má ganga.

Klukkan hefur alltaf verið ágætur mælikvarði.

Annars má kommenta hvaða tíma sólarhringsins sem er hér. Ég á þó nokkuð eftir í að ég ráði mér tæknimenn til að leggja rafstreng frá tölvunni í tærnar á mér sem skjóti nokkrum stingandi voltum í hvert sinn sem berst komment.

Er ég orðin svona gömul, svona heimakær, svona assgoti mikill intróvert og antísósíal einbúi að ég er ekki að höndla nútíma samfélag?
Eða heitir þetta ekki bara að halda í gamaldags mannasiði?
Býð ekki í það ef að væri bankað eftir 10 að kvöldi.
Myndi sennilegast gefa köttunum Alka Seltzer og senda þá á dyr í myrkrinu; froðufellandi varðskrímsli með glóandi glyrnur í niðamyrkri sveitinni.

LEGO

2005-04-12T00:10:00.000Z

Vá....alveg vissi ég að kæmi að því að finndist notagildið einhversstaðar.
Á Vef Morgunblaðsins segir:

Dorrit liðtæk í Legó

Dorrit Moussaieff forsetafrú reyndist liðtæk við að byggja hús úr Legókubbum þegar forsetahjónin heimsóttu leikskólann Iðavelli á Akureyri í dag, sem var liður í opinberri heimsókn þeirra til bæjarins er hófst í morgun.

hvernig

2005-04-12T00:01:00.000Z

Mikil vá steðjar að.....

er hægt að segja Jólin steðja að..?

Mér finnst það frekar hryllingskennt.

Fönn

2005-04-09T20:32:00.000Z

Þetta er rosa skemmtilegt.

Teiknum saman!

Góðar stundir.

snus

2005-04-08T17:37:00.000Z

Og ég er að kvarta yfir að þurfa að snýta mér...
Hvað ætli þurfi margar klósettpappírrúllur til að losa sig við þetta?

utan við

2005-04-08T16:34:00.000Z

Meðal annars hafa annarshugar fjölskyldumeðlimir sett:

*rúllupylsu í saumavélaborð
*ruslapoka í frystikistu
*óhreina tauið út í tunnu
*símann inn í ísskáp
*tannbursta í hnífaparaskúffuna
*inniskóna í bakarofninn
*handþeytarann inn í fataskáp
*skrúfjárn ofan í skólatösku

Ég á heiðurinn af einhverju þarna á listanum og meira til.
Núna finn ég ekki skærin.

Gratt-an

2005-04-08T16:16:00.000Z

Langaði að elda mér blómkálsgratín með stroganoffinu í kvöld. Fór á stúfana á netið til að sjá hvort ég finndi einhverja skemmtilega útgáfu.
Fann nokkrar spennandi. Fann líka þessa uppskrift af Sjúfflör ó grattan (Choufleur au gratin) HÉR. Efsta myndin er af réttinum tilbúnum. Ef þetta tækist svona upp hjá mér færi þetta í tunnuna. Þetta kallast brunnið og ónýtt á þessu heimili. Uppskriftin er líka rosalega óspennandi.

Mín venjulega gratín uppskrift er svona:

1 Blómkálshaus, bútaður niður/rifinn í sundur
3 msk smjör
3 msk hveiti
rúml. 1 bolli af mjólk
Lárviðarlauf
Salt og pipar
Múskat
ca. 1msk Dijon sinnep
Bolli af rifnum osti

Blómkálið soðið í ca. 8 mínútur eða þar til það er mjúkt (samt hálf stökkt).
Bræðið smjörið, hrærið í hveitinu og svo mjólkinni, þetta kunna allir sem gera uppstúf.
Bætið lárviðarlaufinu, múskatinu, salti og pipar út í jafninginn og sjóðið við lágan hita í 5 mínútur.
Hendið þá lárviðarlaufinu, hrærið sinnepinu samanvið og helmingnum af ostinum. Hrærið þangað til osturinn er bráðinn. Raðið blómkálinu í smurt eldfast mót, hellið ostasósunni yfir og dreifið svo afganginum af ostinum yfir herlegheitin. Bakið í vel heitum ofni í uþb. 15-20 mínútur eða þar til þetta er orðið gullið á lit. (NB Gullið, ekki brunnið sbr, link hér að ofan).
Það er rosalega gott að bæta litlum steiktum beikon bitum út í ostasósuna, eða skinku. Nú svo er gott að setja pínu capers líka.

Bæ ðe vei. Ég kann ekkert í frönsku.

vælið

2005-04-07T12:55:00.000Z

Níu nóttum fyrir jól þá kem ég til manna....

Ég ætla að vona að mér batni slenið fyrr en svo.
Annars verð ég búin að glata þekkingunni á mannlegum samskiptum, hvernig þau ganga fyrir sig. Og ef ekki minningunni um hvernig þau ganga fyrir sig líka.
Mikið rosalega er hundleiðinlegt að vera lasinn heima þegar maður býr einn.
Og ekki einu sinni hægt að panta sér pizzu úti í sveit.
Skipti þó aldrei á heimsendum skyndimat og því að geta horft á snjókornin þyrlast yfir grátt fjöruborðið.
Í svo mikilli þögn að mér finnst eins og að heyrist í snjónum ef ég hlusta nógu vel.

Er við það að óverdósa á soundtrackinu úr The Village. James Newton Howard klikkar ekki í snjókomu.

Bjutiful

2005-04-06T09:36:00.000Z

Ég held að ég sé farin að delera á þessari heimasetu með sjálfri mér, snýtipappír og hringlhljóðinu innan úr mér. Kveikti á morgunsjónvarpi stöðvar 2.
Á skjáinn kom buna af einhverju fólki að syngja Karókí, misvel eða misilla. Fer allt efti því hvort maður er týpan sem segir glasið vera hálf fullt eða hálf tómt. Ég fékk mér kaffi á meðan þetta kláraðist og þegar ég ráfaði aftur inn í stofuna var sápuópera komin á skjáinn. Feitletraða og fallega fólkið eða eitthvað álíka.
Þau voru þarna 3 saman á skjánum og rökræddu um Compassion.
Nema að þýðandinn ákvað að það orð væri Samlíð á íslensku.
Samlíð þetta og samlíð hitt. Ég hef aldrei heyrt um nafnorðið Líð áður. Vissi heldur ekki að þetta orð væri til; samlíð. Hef heyrt samhyggð, samúð.
Verður þá illúðlegur=illlíðlegur?

"Kimberley, there isn´t a man out there who wouldnt kill to be your boyfriend".

Off takkinn er snilld.

Talað tungum

2005-04-06T08:32:00.000Z

プログラムを利用すると Blog から収入を得ることができます。

Svona tekur Blogger á móti mér í Safari.
Ég skil hvert orð, bara ef það er í Firefox eða Operu.
Þvílíkt bögg.

flensa

2005-04-04T16:11:00.000Z

Flensan stakk sér niður í rúmið mitt í nótt, vaknaði á hálftímafresti til að snýta mér og endaði á að fara og klæða mig í mikið af fötum til að hætta að nötra undir sænginni. Ætlaði engu að síður í vinnu, þar til að ég áttaði mig á því að ég var orðin raddlaus. Ekki það að söngröddin hafi brugðist, heldur var talröddin orðin að einhverju rasphljóði sem varla heyrðist.
Hóstandi eins og hundur að gelta og geri mitt besta til að eyða eldhúsrúllu birgðum heimilisins, innvafin í sængina eins og stökkbreytt lirfa með skinnlaust nef.

sunnudagur

2005-04-03T20:35:00.000Z

flo3,
originally uploaded by hkvam.

Á meðan sólin skein á heiðbláum himninum lúrðu kettirnir sig og ég skrapp og ljósmyndaði skreið. Ilmandi bryggju-dinglumdangl.
Mér fannst afar gaman að skríða á fætur í sólskini, lesa Morgunblaðið á netinu og sjá þar efsta innlenda frétt um éljagang og slyddu víðast um land allt. Og sólin glotti með mér.

Athugið

2005-04-03T02:43:00.000Z

Hér er undirskriftarlisti á ferð sem mér finnst að sem flestir ættu líta á.
Endilega kíkið á hann, myndið ykkur skoðun, og kvittið.
-eða ekki.

Listinn

Ég hef aldrei trúað á að segja fólki hvaða skoðanir það á að hafa. Treysti því bara að það geti myndað sínar eigin.

paparazzi

2005-04-02T23:25:00.000Z

paparazzi2,
originally uploaded by hkvam.

Það var setið um mig í afmælisveislunni...Ja, ekki bara mig, heldur alla. Drengurinn skaust undan borðum og stólum og myndaði alla í bak og fyrir. Helst þegar verið var að stinga upp í sig kökubitum. Dokúmenteraði ferðir mínar að hlaðborðinu og svei mér ef að ég varð ekki vör við flassglampa þegar ég var að íhuga að hneppa frá mér til að ég gæti andað betur.
Guði sé lof að það var ekki filma í vélinni.

hvitt

2005-04-02T12:49:00.000Z

Á meðan ég svaf draumlausum svefni tók snjórinn sig til og breiddi sæng sína yfir allt, fannhvíta og dúnmjúka.
Verst að mér þykir lítið vænt um þá sæng.
Þrestirnir sem voru byrjaðir að syngja á kvöldin þagnaðir og húsfreyjan gerir dauðaleit að uppteknum pokanum með fuglamat. Glær með hvítum ramma og bláum smáfuglum.
Hellir upp á rótsterkt kaffi og hringir inn heillaóskaskeyti til fermingarbarnsins sem spókar sig eftir smástund í hvítum kirtlinum. Innvígslan í heim fullorðinna, ja, eða allavega á þröskuldinn að heimi fullorðinna.
Á leið í eiss áss ammlis veislu með myndavél í farteskinu og tóman maga. Marenstertur, heitir réttir og þeyttur rjómi.
Hvítur dagur í dag.

Fyrsti

2005-04-01T23:36:00.000Z

Hafði ekki geð í mér að leyfa kvikindinu að fá lausan tauminn og láta einhvern hlaupa í dag.
Litla frænka mín eins árs í dag og í tilefni dagsins hoppuðum við saman í smá tíma ásamt því að tuskast, segja jæja og kasta á milli okkar baðönd.
Tíminn líður það hratt að það er eins gott að nota tækifærið á meðan það gefst til að leika sér.

Rakstur

2005-03-31T15:59:00.000Z

Í tilefni af skegg(um)ræðum hér í kommentakerfinu langaði mig að pósta inn þessum link:

Og boð bárust að skrásetja skyldi skegg

Farið nú að safna.

þriðji i paskum

2005-03-29T14:01:00.000Z

Fjörðurinn gulli sleginn og glitrandi í sólskininu.
Súlur og Glerárdalurinn eins og álfafjöll við bláan himininn, birkið skreytt sólargeislum og grænar lautir fæðast.

Þetta hlýtur að vera flottasta útsýni úr stofugluggum sem hægt er að biðja um.
Ég ætla helst ekki að gera neitt í allan dag.

pirringur

2005-03-28T22:34:00.000Z

Nettengingin mín er sérlega slöpp í kvöld. Lítið annað hægt að gera en að bíta á jaxlinn og muna að það er ekki um neitt að velja í stöðunni. Síminn neitar að ferja ADSL til okkar hérna handan fjarðar þó að allt sé fyrir hendi, módemupphringisambönd eru ekki nema fyrir þá sem treysta sér til að sitja fyrir framan tölvuna í marga tíma í senn til þess eins að millifæra í banka, ISDN er tómt rugl nema á tvöfaldri línu fyrir tvöfalt verð. -síminn græðir á mér alveg sama hvað ég vel. Nema ég haldi áfram minni stóísku ró þegar loftnetstengingin hjá emax dalar. Koma betri dagar með sól í heiði og grænt í haga. -hjá emax.

Ég get þó yfirfært pirringinn á eitthvað annað.
Fischersmálið allt saman virðist sérsniðið fyrir mig í kvöld til að yfirfæra orkuna á.
Upplifði mig eins og á sterkum og jafnframt ólöglegum lyfjum þegar ég horfði á beina útsendingu einkaþotu í boði Baugs lenda á Reykjavíkurflugvelli, beint á báðum stöðvum og yfir öllu einhver Lísu í Undralandi blær. Það hefði ekkert komið mér á óvart þó að íslenski dansflokkurinn hefði verið ráðinn til að sýna spasmatískan dans við landganginn á vélinni , svona til að bjóða manninn velkominn "heim".
Eins og nýjasti jólasveinninn steig hann, eða hrundi öllu heldur, út úr vélinni, skeggjaður eins og afdala einbúi aftan úr myrkum miðöldum, veifaði til unglinganna sem stóðu drukknir á vellinum veifandi skákborðum á milli fljúgandi freyðivínstappanna. Eitt er víst, Fischer hefur varla þótt mikið til koma að sjá svarthvítum borðum veifað, enda nýbúinn að gefa út þá yfirlýsingu að skák værri dauð íþrótt og hann ætlaði sér ekki að tefla meir. Ég hló hrossahlátri, svo að bæði húsbóndinn og kettirnir kipptust við, þegar míkrófóni frá erlendri sjónvarpsstöð var stungið inn um glufuna á bílrúðu, troðið upp í skeggið á karlinum og hann spurður hvað hann ætlaði að gera á Íslandi. Nú...auðvitað að klára klukkuna, enda búið að verja allsherjar samsæri í gangi gegn því að hann næði því. Ég mæli með því að Fischer og frú verði fundin einhverjar Au-pair sem hafa starfsreynslu á Kleppi.
Mér til skemmtunar sé ég stundum fyrir mér þá Fischer og Ástþór rugla reitum, bjóða fram í næstu kosningum. Mér myndi meira að segja nægja að sjá þá saman hjá Gísla Marteini. Þá myndi ég kannski horfa.
Skandallinn kom ekki alveg í beinni það kvöldið, en þurfti ekki annað til en að kíkja á mbl.is til að sjá hvað væri að gerast, þögn sló á blaðamannafund nokkrum tímum síðar og heimspressan búin að fá fullvissu á að þrátt fyrir sýndarmennsku og stórkarlahátt Íslendinga þá virðast einhverjir ráðamenn vitskerrtir.

Ef ég vil íslenskan ríkisborgararétt þá þarf ég skv. mótteknum tölvupósti lögmanns á snærum Dóms- og Kirkjumálaráðuneytis að framvísa skírnar- og fæðingarvottorði móður, mínu eigin líka, ég þarf persónuleikavitnisburð 3ja einstaklinga; helst læknis, lögreglu, lögmanns eða prests, og þó nokkuð af pappírum (í frumriti) um að ég geti sjálf séð mér farborða og hafi alltaf gert. Þá kannski taki þeir þetta til athugunar.
Til að stytta tuðið þá tilkynnist hér með að ég hef ekki í hyggju að tala við prest, lögreglu eða lögmenn. Læknana tala ég við þegar þarf, af öðrum ástæðum.

Spurning um hvort ég ætti að prófa að tjúllast næst þegar harðsoðnu eggin klárast í mötuneytinu í vinnunni.

nærri lokið

2005-03-28T21:23:00.000Z

Þá er páskafríið næstum búið og alvara hverdagsins handan við hornið.
Sólbjartir dagar með súkkulaði í morgunmat að baki, ilmandi greinar af töfratré í vasa á stofuborðinu, hálfbrunnin gul kerti í skál.
Gott að fá einn vinnulausan virkan dag til að aðlagast vinnuvikunni aftur, geta notað stundirnar til að minna sjálfan sig á að einhvernvegin verður maður að geta greitt fyrir páskaegg framtíðarinnar. Geta sópað upp lónni sem fallið hefur til í sólarglætunni við opna gluggana, hugsað fyrir að setja niður vorlauka og hreinsa upp sprek janúarstormsins ásamt því að horfa út á spegilinn í firðinum með rjúkandi kaffibolla og telja stundirnar.

Uppgötvaði mér til mikillrar skelfingar þar sem ég sat í sófanum eitt kvöldið í Kópavogi að ég hafði gleymt því að logga mig út af MSN eða setja mig á away áður en ég hélt yfir heiðar. Búin að dóla um Holtavörðuheiðina á meðan vandamenn sendu mér skilaboð sem var ekki svarað. Erfitt að kenna gömlum hundi að sitja, nokkrum dögum síðar laust því niður í huga mér við uppvask í SKagafirðinum að ég hefði aftur gleymt þessu sama. Ég ber fyrir mig að nú er ég komin með borðtölvu, ekki dugar að loka henni og aftengjast þannig eins og með fartölvuna.
Apple menn í höfuðborginni eru með litlu hvítu iBookina í handayfirlagningu, nýtt móðurborð og hún eins og ný vonandi þegar hún verður sótt í lok viku.

Eftir allt góða veðrið undanfarna daga hefur hugurinn fyllst sólskini og vegurinn framundan einkar gylltur og glitrandi. Enda margt að hlakka til og ýmsar óvæntar uppákomur bíða sennilegast í leyni. Svo er líka þrösturinn kominn í garðinn og æðurinn byrjaður að syngja í kór við opna gluggana mína.

gulur gestur

2005-03-25T11:45:00.000Z

haenur,
originally uploaded by hkvam.

Óvænt heimsókn í hænsnakofann í tilefni páskanna.
Gleðilega páska!

gott

2005-03-20T13:43:00.000Z

Búin að detta niður á ansi mikið af góðri tónlist undanfarið.

*Kontratenórinn Andreas Scholl. Gæsahúð í hámarki. Silki.
*Richard Cheese og Lounge against the machine. Snilld. Mæli með Enter Sandman.
*Hayseed Dixie. Hillbillí útgáfur af ACDC, Zeppelin og fleiri lögum.
*Axiom of Choice. Pakistanskur fílingur með spænskum gítar. Smekklegur heimsbræðingur.
*Ian Bostridge. Lýrískur tenór í hæsta gæðaflokki. Bráðna að innan þegar ég hlusta á lögin úr The English Songbook.

Dollarinn er hagstæður. Kannski einum of.

gadget veiki

2005-03-20T13:29:00.000Z

Tónleikar helgarinnar að baki og komið páskafrí.
Ég hefði verið til í að spila þetta nokkrum sinnum enn, hefði sennilegast verið hægt að fylla húsið 2svar í viðbót lágmark. Mikil stemning, fólk söng með og sumir voru byrjaðir að syngja lögin áður en þau byrjuðu.
Að sjálfsögðu sátu á fremsta bekk hjón sem töluðu saman fullum rómi frá fyrsta lagi og út í gegn. Það tilheyrir víst, virðist varla vera hægt að halda tónleika án þess að þær týpur mæti. En þurfa þær endilega að sitja fremst?

Dagurinn í gær fór í að skrúbba eldhúsgólfið. Gamalt gólf með sennilegast tugi ára bónuppsöfnun. Í þetta fóru nokkrir grófir pottasvampar og þó nokkuð af hreinsiefni. En rosalega er gólfið hvítt núna.
Var að uppgötva mér til skelfingar að á Mac Mini er að sjálfsögðu ekki innbyggður míkrófónn. Nú get ég ekki notað Skype nema að fara og versla mér eina græjuna enn, USB míkrófón eða álíka. Held að ég láti það bíða þar til iBookin kemur úr viðgerð. Hrikalega er skrítið að hafa svona öfluga vél í litlum kassa. 16cm á kant og 5cm hár. Magnað.
Hef aldrei lent í því að Makki bili hjá mér, hvað þá að móðurborðið fari eins og í laptopnum um daginn. Rákir dauðans og titringur á skjánum og fimbulfrost. Þekktur galli segir umboðið og því framlengd ábyrgð, sem betur fer.
Ég hef áður viðurkennt að ég er tölvu og netfíkill. Gat ekki hugsað mér að vera tölvulaus í mánuð og ákvað því að færa Mac Mini kaupin fram um hálft ár. Oft er nauðsyn en nú var neyð.
Nú vantar mig skrifborðsstól.
Og þráðlausan sendi.
Og tölvuborð.
Og míkrófón.
Og Midi snúrur.
Og og og...

Kríli

2005-03-20T01:15:00.000Z

Nú má telja þetta kríli til heimilis í sveitinni.
Alveg frábært.

Patrekur

2005-03-18T17:52:00.000Z

Í tilefni St. Patreksdags þá bendi ég öllum á að lesa þessa Tímalínu í boði Lauksins. (linkur í titli)

Gleðilegan Paddís dag.

sýran

2005-03-16T23:49:00.000Z

Vá....hver þarf á eiturlyfjum að halda!
Spilaði sítarsýru í Strawberry Fields á æfingu í kvöld í bland við súpersýru annarra hljóðfæraleikara.
Mæli eindregið með þessum tónleikum!
Bítladagskrá í Ketilhúsinu á föstudags og laugardagskvöld klukkan 21:00.
Leikhúskórinn, Pálmi Gunnarsson, Sigurður H. Ingimarsson, Ingimar Guðmundsson og slatti af súper hljóðfæraleikurum. Allt í stjórn Roars Kvam.
Magnað! Groovy, Far out.......man.... .
Dagskránna má sjá hér.

Ef einhver lumar á uppskriftum með bókhveiti þá vinsamlegast hafið samband. Þetta bragðast eins og lím og lítur út líkt og að Alien hafi verpt á diskinn hjá mér.

gaulið

2005-03-16T00:18:00.000Z

Ég get ekki að því gert, en ég fæ klígju, útbrot og meirháttar hroll í hvert sinn sem malt og appelsín er auglýst.
Þetta barn gaulandi lagleysuna lengst niður í r***gati.
Týpískt fórnarlamb leikskólastefnunnar í söng.
Gaula nógu hátt í styrk, og sem lengst niðri.
Elsku fóstrur Íslands, leyfið nú börnunum að syngja á því tónsviði sem er þeim eðlilegt og upp í höfuðið. Þetta er hryllingur fyrir söngstjóra og kórstjóra að fá krílin í hendurnar vælandi sáran yfir því að þetta eða hitt lagið sé svooo háááááátt.
- og hæsta nótan ekki nema einstrikað g.
Merkilegt að þegar í sjónvarpi eru sýnd börn að syngja þá sjást börn annarsstaðar í heiminum syngja fallega höfuðtóna sem hljómar ansi vel(nokkuð líkt ef ekki nákvæmlega eins og barnasöngur), til samanburðar mæta íslensku glókollarnir og jarma eins og grýlubörn með slæma barkabólgu.
Þetta er ekki orðum aukið.
Því miður.

Páááásssshka sóóóóó hl.......
Jakk!

satansdrykkur?

2005-03-15T22:40:00.000Z

"Kók Læt" hlýtur að vera ógeðslega vont.
Það er varla hægt að kaupa nokkurn hlut, leigja sér spólu eða fara nokkuð án þess að þessu sé troðið upp á mann. Ókeypis.
Meira að segja Heilsupakkinn sem femin.is bauð upp á eftir jólin innihélt þessar veigar.
Enda ógurlega hollt að drekka kóladrykki eða aðra beinvefseyðandi vökva (sbr. tönnin sem hverfur í kólaglasinu á skömmum tíma).

Alternatív notkun kóladrykkja:
*Hellist yfir stungu eftir marglyttur - losar þig við sviðann strax!
*Látið ljósmynd liggja í gosinu (í bakka t.d.) og hún lítur út fyrir að vera gömul.
*Til að losa tyggjó úr hári, hellið yfir lokkinn með tuggunni og hún losnar.
*Til að ná mosa af stáli, t.d. sláttuvél eða garðhúsgögnum.
*Sem hreinsilögur fyrir brons
*Sem hreinsiefni til að ná myglu úr fúgum milli flísa
*Ljótur olíublettur á bílaplaninu? Helltu kók yfir! (Löggan í sumum ríkjum BNA keyrir um með stórar flöskur í skottinu til að hreinsa upp blóð af vegunum....)
*Sem rottubani: Rottum finnst kók gott og drekka mikið af því og hratt. Því miður geta rottur ekki ropað
*Til að ná ryði af krómi nuddið kóki með álpappír yfir blettinn
*Til að halda niðurföllum stíflufríum er gott að hella einni dós niður á mánuði

Þetta virkar ekki með diet drasli. Ekkert sissí stöff hér.

veisla

2005-03-15T01:01:00.000Z

Nú er ég búin að fá sendinguna mína frá Amazon. Jiiiiiiiiiii.........og þvílík veisla! (hér á við að setja inn þungt sæluþrungið andvarp)

A natural history of the senses eftir Diane Ackerman
The seven sins of memory eftir Daniel L. Schachter
Adams Navel: A natural and cultural history eftir Michael Sims
Augustus eftir Allan Massie
The Book of ratings eftir Lore Fitzgerald Sjöberg
String of pearls eftir Joanne Lund
Teaching music with passion eftir Peter Loel Boonshaft
Making music for the joy of it eftir Stephany Judy
The Enemy eftir Lee Child

Þetta ætti að nægja framyfir páskafrí.
Á milli kafla leggst ég á bæn og bið um að dollarinn lækki enn meir.

grænt

2005-03-15T00:10:00.000Z

boxiÃ°,
originally uploaded by hkvam.

Ísköld niðurtalning að páskafríinu. Framundan bíða margir skemmtilegir dagar.
Fæ gestafyrirlesara á morgun í valáfangann minn, verður örugglega mjög gaman og fróðlegt. Tónfundur nemendanna í tónlistardeildinni á miðvikudaginn, séns fyrir stigsprófnemendur að fá að spila eitt af prófverkefnunum. Ekki þó gangandi þríundir í d moll eins og ein spurði um.
Æfingar fyrir bítlatónleikana hjá leikhúskórnum byrja með öllu á miðvikudagskvöldið og "sýningar" verða á föstudags og laugardagskvöld í Ketilhúsinu. Ég fæ að sjá um strengina, sítarinn og bassaklarinettsólóið í When I´m sixtyfour meðal annars. Triton græjan mun sumsé mæta með mér í vinnu.
Afmæli og fermingar handan hornsins, skreppitúrar yfir Tröllaskaga og suður fyrir heiðar, birgðatalning lambakjöts í frystihólfinu.
Saknaði græna litsins þegar ég lenti á stálfuglinum í morgun, leit út um sporöskjulagaðan gluggann yfir hvítan fjörðinn. Mundi svo að undan ströndum liggur hafís á leið í suðurátt; best að hlaða batteríið í myndavélinni. Er orðin nógu stór til að hætta að hafa martraðir kryddaðar af "Á Skipalóni" , en er enn með flóttaleiðina fasta í minninu sem við frænka mín fundum upp á ef ske kynni að með hafís skyldi slæðast banhungraður hvítabjörn.

mundu mig

2005-03-11T12:43:00.000Z

Tölvan hefur tekið upp á því að láta mig skrá mig inn á Blogger í hvert skipti sem ég ætla að skrifa. Tók þá eftir að hakið var farið úr Remember me.
Af einhverjum furðulegum ástæðum fór af stað í Hausútvarpinu hjá mér When I am laid in earth úr Dido og Aeneas eftir Purcell.
Remember me.....remember me....
Hvernig sem að innskráning á blogger og elsta ópera Bretlands náðu að búa til einhverja tengingu í höfðinu á mér, þá mundi ég allavega eftir að setja hakið á Remember me.

Annars má finna librettoið fyrir óperuna hér.

leifar

2005-03-11T01:35:00.000Z

Ein vikan enn nærri að baki. Ótrúlegt hvað tíminn líður hratt, marsmánuður hálfnaður eftir helgi og páskafrí á næsta leiti. Vorgormurinn í mér vaknaði í góða veðrinu og blogletissýkillinn hreiðraði um sig um leið. Frost og norðangarri í kortunum. Gæti hæglega lagt sýkilinn í dvala aftur. Ég lofa engu....

Aðstoðaði litla frænku mína við kvöldmatinn. Reif niður brauð, gaf henni nokkur korn af kjöthakki, flís af ferskum svepp og smá papriku. Heilt veisluborð breitt út fyrir hana og áfast stólnum. Ekki amarlegt ef maður kæmist nú einhverntíman í þá aðstöðu að verða negld í stól föst við tertuhlaðborð. Ungfrúin dugleg að borða og tuggði afar pent með þessum fáu tönnum, greinilega byrjuð að skilja að það er ókurteisi að leifa. Kláraði ógurhratt af "borðinu" þar til upp komst trikkið á bak við þessa ógurlegu matarlyst. Hún var búin að troða niður um hálsmálið og niður á bak flest öllu því sem hafði verið sett fyrir framan hana á meðan við fullorðna fólkið dáðumst að því með öðru auganu hvað hún var dugleg.
Þegar ég var krakki höfðum við bróðir minn sem vana að tilkynna gestum að "við leifum ekki hér". Mamma fann stundum hálfétnar brauðsneiðar undir sófa. Gestirnir hafa sennilegast verið afar færir sjónhverfingarmenn miðað við aldur.
Enn þann dag í dag situr í mér að leifa ekki. Fæ mér afar sjaldan meira en í hálft glas eða hálfan bolla. Þó að reglan hafi verið sú að henda ekki mat var þó óskrifuð regla að maður mátti alltaf fá sér meira.
Ég stöðvaði ungan dreng í hádeginu í vinnunni í dag þar sem hann var að henda kúfuðum disk af mat í ruslið, þ.e. disknum, matnum og hnífapörunum. Ég náði þá að verða einhverskonar "leifafræðingur" í dag, þó að það hafi ekki verið beinagrindur sem ég var að grafa út úr moldarbarði.

rugl

2005-03-08T01:33:00.000Z

Ætlaði að fara að setja fleiri myndir á flickr.com síðuna mína.
Upp kom þá síða sem á stóð

Flickr is having a massage

merkilegt-
ég hef aldrei heyrt af því að vefsíður fari í nudd.

Sjálfri veitti mér ekki af smá nuddi, er með strengi strengda á háa tóna eftir að skrúbba bílinn í góða veðrinu í gær. Litlar tjörubólur þöktu bílstjórahliðina og ég hamaðist eins og ég gat við að ná þeim af. Mokaði vetrinum út úr innréttingunni og pússaði vorið ofan í mælaborðið.
Keyrði svo um í sólskininu á skínandi bíl með gluggana niður og óskaði að ég hefði tekið með mér húfu.

vátshj

2005-03-07T00:11:00.000Z

Myndin mín af stólnum varð í 2. sæti.
Ég er enþá svo hissa yfir þessu.
Þetta gat húsfreyjan þá og með ekki merkilegri græju en imbadigital vél.

leti

2005-03-03T23:31:00.000Z

Helgin handan við hornið, bíður með poka á bakinu, fullan af rólegheitum og fersku lofti. Úrslit á sunnudag í ljósmyndakeppninni sem ég tók þátt í, ég orðin þó nokkuð spennt að sjá hvernig stólinn minn í garðinum kemur út miðað við alla hina stólana utandyra. Óska mér oft að ég ætti góða vél til að taka myndir á, þó svo að græjurnar skipti kannski ekki öllu máli eins og í svo mörgu öðru.
Bloggleti sótti að mér. Einhver leti var það allavega, ég tók meira að segja upp á því að leggja mig þegar ég kom heim úr vinnu, bara svona til þess að prófa það og sjá hvað bíði mín í ellinni.
Verð að segja að mér finnst lítið varið í að reyna að hræra saman einhverjum kvöldmat svona nývöknuð.
Matseðillinn steikt hrísgrjón með ýmsu úr ísskápnum og ferskt mangó í eftirrétt.

rokkið

2005-03-02T23:15:00.000Z

Frábær þáttur á RUV um Carol Kaye.
Aldrei datt mér í hug að þessi kona hefði spilað í öllum þessum lögum. Mér datt ekki einu sinni í hug að það hefði verið kona........
Eitt prik fyrir RUV.
Staða = 2 prik
Það þarf samt meiri prik til að ég verði sátt við afnotagjaldið.

Lestur

2005-03-01T18:13:00.000Z

Keypti mér um helgina bækur á útsölu í Eymundsson á Smáratorgi. Brá heldur betur í brún þegar ég gekk upp að afgreiðsluborðinu og ætlaði að borga. Var búin að sýna þennan líka hrikalega viljastyrk við bókahlaðið útsöluborðið, valdi úr 2 stykki sem mér leist best á og reyndi af veikum mætti að renna ekki hýru auga í áttina að þessu dúsini sem mig langaði líka í. Taldi viturlegt að eyða ekki nema í mesta lagi 2000 kalli í þessar tvær þar sem ég er að bíða eftir risasendingu frá Amazon. Stúlkan við kassann tuggði og blíbbaði bækurnar inn í kassann, horfði svo út í bláinn og muldraði "það gera 834 krónur". Ha? Fyrir 2 bækur? Á Íslandi? Rokna afsláttur, lokatilraun bóksölu til að losa sig við kiljur sem enginn nema húsfreyjur úti í sveit vilja sjá.
Sé rosalega eftir einum fimm sem ég skildi eftir á borðinu.
Hélt þó glöð í bragði á brott með framtíðarvitneskjuna í grænum poka.

Nældi mér í allar 3 bækurnar eftir Fynn um Önnu og Herra Guð, í einni.
Las Önnubók og Herra Guð, þetta er hún Anna í tætlur fyrir mörgum árum. Hef aldrei lesið 3ju bókina, Anna and the black knight. Verður spennandi og án efa svona "aha!" upplifun, gerist því miður alltof sjaldan þegar maður les svokallaðar fílósófískar bækur. Heimsspeki var víst, og er kannski enn, kölluð Heimsk-speki af nemum í Háskólanum, þeim sem voru í öðru námi. Ég á enþá eftir að detta niður á bók skrifaða af löggiltum heimspekingi sem mér finnst góð. Og já, ég hef lesið Pál Skúlason ef einhverjum skyldi detta í hug að bjóða mér Pælingar II til aflestrar. Takk, en nei takk ómögulega.
Þó svo að Anna hafi ekki verið heimsspekingur þá setti hún fram hugmyndir sínar um heiminn, pólitík og trúmál með sakleysi 6 ára gamallrar stúlku. Það þarf oft ekki flókin orð og langar setningar til að segja mikið og stundum virðist hreinlega ekki borga sig að hugsa í of marga hringi.
Mæli óhikað með henni Önnu.
Úr léttri lesningu ákvað ég að taka stórt stökk ofan í heybinginn, moðhrúguna. Skellti mér líka á einkar áhugaverða bók eftir Stephen Jay Gould; The Hedgehog, The Fox and the Magisters Pox: Mending the gap between science and the humanities.
Verður spennandi að sjá hverju er kastað fram þar.

Merkilegt nokk; ég gleymdi í morgun að taka inn moðkapsúlurnar frá jurtalækninum.